Денеска намалувањето на воспалението(инфламацијата) преку исхраната е популарен тренд. Но, што е всушност воспаление и како одредена храна може да помогне?
Воспалението е природен одговор на телото на инфекција, повреда или болест. Тоа е нормален и важен дел од процесот на лекување.
Но постои и хронично воспаление – состојба на постојано активирање на имунолошкиот систем и е важен дел од многу болести како срцеви заболувања, автоимуни заболувања, дијабетес, гастроинтестинални заболувања, Алцхајмерова болест, некои видови на рак итн.
Исхраната има голем придонес за хроничното воспаление.
Затоа, има смисла да се следи она што стана познато како „анти-инфламаторна диета“. Само има еден проблем: „Не постои „една“ единствена анти-инфламаторна диета, иако многу луѓе го користат тој термин.
Наместо тоа, постои храна која го намалува воспалението (анти-инфламаторна храна) и онаа која го зголемува и од која настанува.
Која храна е инфламаторна?
Ултра-процесираната храна, која вклучува речиси сè што доаѓа во пакување – како виршли, дехидрирани супи, пецива, бел леб и тестенини, рафинирани брашна, слатки, преработени житарки, преработено месо, бисквити, бонбони, сосови итн
Овие намирници имаат мала хранлива вредност. Уште полошо, тие се богати со додадени шеќери, сол и адитиви. Сите овие состојки се поврзани со промовирање на воспаление во телото.
Тие може да доведат до дисбиоза(нерамнотежа) на цревната микрофлора односно да влијаат на видовите на бактерии кои ги населуваат вашите црева и нивните хемиски нуспроизводи, а пак ова до воспаление.
Додека некои намирници го поттикнуваат растот на бактериите кои го стимулираат воспалението, други го поттикнуваат растот на бактериите кои помагаат да се потисне истото. Затоа е важно да се знае која храна има антиинфламаторни својства, а која може да предизвика воспаление.
Која храна е анти-инфламаторна?
Храна која е цела, непреработена, без додадени шеќери и адитиви е анти-инфламаторна храна, односно се верува дека антиоксидансите кои се наоѓаат во оваа храна може да го намалат ефектот на слободните радикали, кои ги оштетуваат клетките.
Компоненти кои можат да помогнат во борбата против воспалението вклучуваат:
• Растителни влакна кои се наоѓаат во овошјето, зеленчукот, а особено мешунките и целите зрна како киноа, хељда, овес и трици.
• Омега-3 масни киселини кои се наоѓаат во рибата (како лосос, скуша, сардина, туна), ореви, ленено семе, чија, итн.
• Полифеноли (растителни фитонутриенти) кои се наоѓаат во бобинкастото овошје, темно чоколадо, чај, кафе, соја, зачини, зеленчук и овошје.
• Незаситени масти кои се наоѓаат во бадеми, ореви, ленено семе, семки од тиква и сусам и растителни масла (маслиново, кикирики, канола).
СОВЕТ:
Не се обидувајте одеднаш да се префрлите на нов стил на исхрана. Започнете полека со правење промени, така што тие ќе станат повеќе промена на животниот стил наместо „одење на диета“.
Обидете се да јадете помалку храна што доаѓа во пакување и повеќе тоа што мајка природа ни го дала. Применете го тој пристап на секој оброк.
Колку повеќе боја и разновидност додавате во оброкот, толку повеќе ќе внесете природни соединенија кои се борат против воспалението.
Ако ви е поудобно да следите одреден план за исхрана, размислете за Медитеранската диета или (DASH)диетата -Диететски пристапи за запирање на хипертензијата бидејќи тие ги поседуваат сите антиинфламаторни елементи и се научно докажани дека делуваат, за разлика од другите диети.
Нутриционист: Вероника Минов