Дали секојдневно конзумирање на семиња ( ленено семе, чија, семки од тиква, сончоглед) и јаткасти производи (бадеми, лешници, ореви) може да го зголеми нашиот холестерол?
Одговорот е НЕ, и битно е овие семиња и јаткасти производи да бидат дел од нашата секојдневна исхрана.
Најпрвин кратко за холестеролот.
- Холестеролот е “восочна” супстанца слична на маснотиja која природно ја произведува црниот дроб, а се наоѓа и во храна oд животинско потекло како јајца, месо, млечни производи итн. Тој е клучна градежена компонента на клеточните мембрани и е вклучен во различни физиолошки процеси во телото. Служи како претходник за синтеза на хормони, како што се естроген и тестостерон, како и жолчни киселини кои помагаат во варењето и апсорпцијата на мастите од исхраната. Исто така е вклучен во производството на витаминот Д.
- Всушност, производството на холестеролот е од толку голема важност што нашиот црн дроб и црева создаваат околу 80% од холестеролот што ни е потребен за да останеме здрави. Само околу 20% доаѓа од храната што ја јадеме.
- Е сега холестеролот се транспортира во крвотокот во форма на липопротеини. Постојат два главни типа на липопротеини:
Липопротеини со ниска густина (LDL), кој е често познат како „лош“ холестерол и липопротеини со висока густина (HDL) познат како „добар“ холестерол.
Кога нивото на ЛДЛ е покачено, тоа може да доведе до акумулација на холестерол во артериите, што придонесува за формирање на наслаги, а тоа пак до зголемување на ризикот од кардиоваскуларни болести.
Од друга страна пак ХДЛ помага да се отстрани вишокот холестерол од крвотокот и го носи назад во црниот дроб за екскреција. Повисоките нивоа на ХДЛ генерално се поврзани со намален ризик од кардиоваскуларни заболувања.
- Многу студии докажаа дека секојдневно конзумирање на семиња како и јаткасти производи го подобруваат тоталниот холестерол, односно го намалуваат лошиот (LDL), а го зголемува добриот холестерол (HDL).
Зошто?
Бидејќи се богати со здрави масти како моно и полинезаситени кои токму тие се одговорни за претходно наведеното.
Oвие полинезаситени масни киселини (омега 3 масни киселини) се есенцијални за нашиот организам, односно нашето тело не може да ги произведе, а се од голема важност за правилна функција на мозокот, очите, срцето итн.
Тие се наоѓаат во мрсните риби како лосос, сардини, пастрамка, туна , а ги има и во ленот, чијата, оревите, сојата итн.
Исто така овие масни киселини се дел од клеточните мембрани и овозможуваат нивна правилна функција. Нивен дефецит предизвикува инфламаторни процеси во нашето тело.
- Покрај овие многу битни за нас масни киселини, јатките и семињата содржат и диететски влакна, протеини, витамини, минерали и фитонутриенти, кои сите заедно придонесуваат не само за подобар липиден статус туку наше целокупно подобро здравје.
- Се разбира умереноста е клучот за се, па така и со нив. Но немојте да ги броите кога ги јадете, бројте ги работите кои содржат заситени масти и холестерол ( ги напоменав на почетокот) , бидејќи тие се оние кои го покачуваат нашиот холестерол не семињата и јатките.
Совет: Вметенети ги семињата и јатките во вашиот доручек или како додаток во вашите салати, печен зеленчук, лепиња, супи, а кај деца и како дел од нивните ужинки
Нутрициониста Вероника Минов
