Нивото на шеќер во крвта е склоно кон промени и на него влијаат многу фактори. Затоа е важно секој човек со дијабетес да ги следи овие промени. Да се знае која храна во која ситуација има најголемо влијание на овие промени, која физичка активност, во кое време од денот и слично. Токму тоа е главната причина зошто вредноста на шеќерот во крвта мора да се проверува секојдневно, неколку пати и во различно време.
Самоконтролата и мерењето на шеќерот е речиси најважниот фактор во третманот на дијабетесот.
Пациентот ја игра најважната улога во контролата и лекувањето , без негово активно учество не може да се спроведе успешно регулирање.
За да се намалат осцилациите на шеќерот во крвта, премногу ниските или високите вредности (хипогликемија и хипергликемија) , пациентот мора редовно да го контролира и следи неговиот шеќер.
Зошто е важно да се пишува дневник?
Резултатите од самоконтрола на гликоза во крвта се запишуваат во дневник за мерење и му овозможуваат на пациентот да го разбере влијанието на видот и количината на оброците, интензитетот на физичката активност и редовноста на земање лекови и како тие се одразуваат врз висината на гликоза во крвта. Така, пациентот може подобро да ги одржува целните вредности на гликемијата. Исто така, дневникот му дава на лекарот увид во движењето на вредностите на гликозата во подолг период за да може да се прилагоди терапијата.
Вашата „домашна лабораторија“
За домашно мерење на гликоза во крвта, пациентите добиваат комплет за мерење, кој се состои од глукометар (апарат), тест ленти, ланцети и ланцетар за вадење крв од прстот.
На пазарот има глукометри од различни производители, со повеќе или помалку еднаков квалитет, а секој тип доаѓа со одредени,соодветни ленти.
За мерење, важно е пациентот секогаш да го користи само својот глукометар, бидејќи дозволеното мало отстапување во измерените вредности секогаш ќе биде исто, така што нема да влијае во голема мера на резултатот. Никогаш не е добро да ги проверувате и споредувате резултатите од вашиот глукометар со туѓи, но ако треба да ја проверите точноста, тогаш можете да ги проверите резултатите од шеќерот од истата капка крв на глукометарот и во лабораторија.
Времето и зачестеноста на мерењето на гликозата во крвта варира од пациент до пациент и зависи од планот за лекување. Најчесто се мери наутро на празен стомак, пред јадење и два часа после јадење, но може да се мери и во текот на ноќта или после физичка активност, а секој треба да измери доколку не се чувствува добро.
Инструкции за правилно мерење
За правилно мерење, треба да се следат упатствата за да се избегнат погрешни резултати:
- Рацете треба да се измијат со топла вода и сапун и добро да се исушат. Топлата вода ја подобрува капиларната циркулација и го олеснува добивањето капка крв по убод. Топчето на прстот не треба да се стиска, но прстот може нежно да се масира со движења од коренот до врвот. Со стискање на прстот, резултатот може лажно да се спушти или да се подигне до 20%. Влажните раце или остатоците од храна на вашите раце може да дадат неточни резултати.
- Дома не е потребна дезинфекција со алкохол, па дури и кога се користи, добро исушете го прстот, избришете ја првата капка крв и искористете ја втората капка за мерење. Мешањето на алкохол со крв предизвикува лажно низок резултат.
- Подгответе го ланцетарот, глукометарот и лентата за тестирање, а откако ќе ја вметнете лентата за тестирање во глукометарот, почекајте сигнал дека уредот е подготвен за мерење.
- Секогаш треба да користите нова ланцета за инјектирање, бидејќи употребената може да предизвика болка или повреда. Секој ланцетар овозможува различна длабочина на инјектирање, во зависност од дебелината на кожата. Капката крв треба да биде доволно голема , бидејќи премалата капка предизвикува грешка.
Тест лентите треба да се чуваат точно според упатствата на производителот (внимавајте на температурата и влажноста на складирањето) Треба да внимава и на датумот на истекување пред и по отворањето на кутијата.